காற்றலையும்
பறவைகள்  ஈக்களென
நெளிந்து
இன்மையின் பிரதியை
வெண்படலக் கித்தானில்
ஓவியமாக்கின

அதன் விரிசல் கோடுகள்
உன்மத்தத்தின் பிடி தாங்கியவை
எட்டவியலாத காண்பதற்கரிய
தொலைவில்
தீட்டப்பட்டவை
வெளியில்
மிதக்கும்
அரூபக்குழைவு 

ஓவியத்தின் நீளும் உருவம்
மின்னலைக்குள்
பாய்ந்து நிலத்தில் விழும் காக்கையைக் கண்டது போல
மூதாதை மரத்தின்
இலைக்கூட்டங்களைப் 
பதற வைக்கிறது

ஆதி காலத்தின் சுழற்சியான 
அரூப ஓவியத்தில்
எங்கோ ஓரிடம்
கான்கிரீட் கோபுரத்தின்
அஸ்திவார நிழலின் பிசுபிசுப்பு
கருமையாய் படிவதைக் கண்ணுற்ற
வௌவால் குஞ்சு தன்
உடலைச் சிலுப்பி
இரவின் குருதியை எரியும் சிதை மேல்
பீய்ச்சி அடித்தது.